Get Our Android App

श्रीमानको बन्चरो प्रहारबाट श्रीमती गम्भीर घाइते

स्याङ्गजा। श्रीमानको बन्चरो प्रहारबाट स्याङ्गजामा एक महिला गम्भीर घाइते भएकी छिन्।

 

जिल्लाको विरुवा गाउँपालिका वडा नं -७ सुरुङ निवासी ४२ वर्षीय हुम बहादुर थापाले सोमबार बिहानै अन्दाजी ३ बजेको समयमा आफ्नै श्रीमती ४० वर्षीया मिना थापालाई बन्चरो प्रहार गरी घाइते बनाएको प्रदेश प्रहरी उपरीक्षक अरुण पौडेलले जानकारी दिए।

 

पौडेलका अनुसार बन्चरो प्रहारबाट श्रीमती मिनाको बायाँ कुम र ढाडमा गहिरो चोट लागेको छ। उनलाई उपचारका लागि प्राथमिक स्वास्थ्य केन्द्र वालिङ पठाइएकोमा अस्पतालले पोखरा रिफर गरेको छ। प्रहरीका अनुसार उनको स्वास्थ्य अवस्था गम्भीर छ।

 

स्याङ्गजाका प्रहरी नायव उपरीक्षक तथा प्रहरी प्रवक्ता राजेन्द्रप्रसाद अधिकारीका अनुसार मदिराले मातिएका श्रीमान हुम बहादुरले घरायसी विवादमा श्रीमती माथी बन्चरो प्रहार गरेको बताए। हाल उनको मणिपाल शिक्षण अस्पतालमा उपचार भइरहेको र स्वास्थ्य अवस्था सुधारोन्मुख भएको जानकारी दिए।

 

घटनाको सूचना लगत्तै खटिएको प्रहरीको टोलीले श्रीमान हुम बहादुरलाई नियन्त्रणमा लिएर थप अनुसन्धान प्रक्रिया अगाडि बढाएको प्रवक्ता अधिकारीले जानकारी दिए।

 

यो पनि, हत्या गरी सेफ्टी ट्यांकीभित्र शव लुकाउने पाँच जना पक्राउ

झापाको गौरादह नगरपालिकाका ४६ वर्षीय मबेसिर हुसेन मियाँलाई धारिलो हतियार प्रयोग गरी हत्या गरेको अभियाेगमा पाँच जना पक्राउ परेका छन्।

 

पक्राउ परेका तीन महिला र दुई पुरुषलाई इलाका प्रहरी कार्यालय दमकले सोमबार पत्रकार सम्मेलनमार्फत सार्वजनिक गरेको छ। पक्राउ पर्नेहरूमा गौरादह-५ का ३१ वर्षीय महम्मद सद्दाम, उनकी श्रीमती २८ वर्षीया सुमेरन खातुन, सोही ठाउँका २६ वर्षीय महम्मद सुलेमान, उनकी श्रीमती २२ वर्षीया रुक्सार खातुन र ३८ वर्षीया कुर्समान खातुन रहेको प्रहरी कार्यालय झापाका एसपी सानुराम भट्टराईले जानकारी दिए।

 

उनीहरूले व्यक्तिगत रिसिबीका कारण हत्या गरेको अनुसन्धानबाट खुलेको छ। प्रहरीका अनुसार मबेसिर हुसेन मियाँ कात्तिक ११ गते बिहान ११ बजेदेखि हराएका थिए। श्रीमान् बेपत्ता भएपछि उनकी श्रीमती नुरजन खातुनले कात्तिक १४ गते इलाका प्रहरी कार्यालय दमकमा निवेदन दिएकी थिइन्।

 

प्रहरीमा निवेदन परेपछि प्रहरीले खेजी गरेको थियो। प्रहरी टोलीले कात्तिक २६ गते दिउँसो साढे २ बजे गौरादह-५ स्थित महमद सद्दामको घर खानतलासी लिएका थिए।

 

सद्दामको घरको दक्षिणतर्फको कोठाभित्र गेरु रङ्गले चारैतर्फको भित्री गारो पोतिएको, कोठाको झ्यालको पल्ला तथा ग्रीलहरूमा रगतजस्तो रातो पदार्थको छिटाहरू फेला पारेको थियो।

 

त्यस कोठादेखि दक्षिणतर्फ बाहिर रहेको शौचालयको सेप्टी ट्याङ्कीमाथिको गोबरको गुइँठाको चाङ हटाई सेप्टी ट्याङ्कीभित्र खोजी गर्दा मियाँको शव फेला परेको एसपी भट्टराईले बताए।

 

‘उनलाई धारिलो हतियार प्रहारबाट हत्या गरी कम्बलमा पोको पारी सेप्टी ट्याङ्कीभित्र फालिएको थियो,’ एसपी भट्टराईले भने, ‘दुर्गन्धित अवस्थामा फेला परेको शवलाई लाशजाँच मुचुल्का समेतको अनुसन्धान गरी पोस्टमार्टमको लागि शवलाई धरानस्थित बिपी कोइराला स्वास्थ्य विज्ञान प्रतिष्ठान घोपा क्याम्प पठाएका थियौं।’

 

प्रहरीले घटनामा प्रयोग भएका घरेलु हतियार दाउ, छुरी र मार्तोललगायत प्रमाणयोग्य वस्तुहरू बरामद गरेको छ। घटनामा संलग्न पाँचै जनामाथि कर्तव्य ज्यान मुद्दा दर्ता गराई झापा जिल्ला अदालतबाट म्याद थप गरी अनुसन्धान थालेको उनले बताए।

Leave a Reply

Your email address will not be published. Required fields are marked *