Get Our Android App

साताको पाँच दिन नै बढ्यो Nepse, लगानीकर्तामा उत्साह

सेयर बजार साताको अन्तिम दिन बिहीबार पनि सकारात्मक नै भएको छ । यो साता पाँचै दिन नेप्से बढेको छ । यो साता मात्र नेप्से करिब २२५ अंकले वृद्धि भएको हो । बिहीबार पनि नेप्से सूचक १३.०४ अंकले बढेर २७८२.१७ मा बन्द भएको छ  र ५ अर्ब ३९ करोड रुपैयाँभन्दा बढीको सेयर कारोबार भएको छ । बारम्बार तलमाथि गर्दै घम्साघम्सीका बीचमा अन्ततः सूचक दोहोरो अंकका साथ बढ्न सफल भएको हो ।

क्रेताहरु सकेसम्म घटाएर किन्न खोज्ने र बिक्रेताहरु पनि सकेसम्म सस्तो किन्न खोज्दा बजारमा दिनभर जसो सूचक कहिले हरियो त कहिले रातो हुने प्रवृत्ति चलिरह्यो । यसअघि सस्तो भाउमा सेयर किनेका अल्पकालीन कारोबारीले केही हदसम्म बिक्री गर्ने क्रम पनि जारी रह्यो । तर बजार समग्रमा बुलिस प्रवृत्तिमै देखिएकाले उनीहरुको सेयर खरिद गर्नेहरु पनि उत्तिकै सक्रिय देखिएको ब्रोकरहरुको भनाई रहेको छ ।

यस साताको सुरुदेखि नै लगातार बजार बढेकाले अल्पकालीन कारोबारीले केही मात्रामा नाफा बुक गर्न खोज्नु स्वभाविक भए पनि बढ्दो बजारमा क्रेताहरुको मनोविज्ञान पनि सकारात्मक देखिएको छ । सोही कारण बजार करेक्सन हुन खोजे पनि अन्ततः क्रेता पक्ष नै हावी भएका हुन् ।

यसअघि छोटो समयमा बजार ठूलो अंक गुमाएकाले पनि अहिले बजार थप बलियो बन्ने कोशिस गर्दैछ । किन भने बजारमा सेयर भाउ निकै सस्तो भइसकेको छ । सस्तो भाउमा साना तथा ठूला, व्यक्ति अनि संस्थागत सबैप्रकारका लगानीकर्ता उत्साहित भएका छन् । केन्द्रीय बैंकले अनावश्यक ब्याजदर उतारचढावमा सर्किट ब्रेकर लगाइदिएकाले पनि बजारमा लगानीकर्ताको मनोबल सकारात्मक भएको हो ।
लाभांशको सिजन चलिरहेको छ । कम्पनीहरुले धमाधम बुक क्लोज र साधारण सभाको मिति सार्वजनिक गरिरहेका छन् । अहिले कायम सेयरधनीले छोटो सयममा लाभांश हात पार्नेछन् । यस्तै, सूचीकृत कम्पनीहरुको प्रथम त्रैमासको वित्तीय विवरण पनि आउन थालेको छ । औसतमा नाफा वृद्धि भएको विवरण आएमा त्यसले बजारलाई अझै सकारात्मक बनाउन सहयोग पुग्नेछ ।
लगानी गर्दा कम्पनी छनोटमा भने विशेष ध्यान दिन आवश्यक हुन्छ । कम्पनीको नाफा, रिजर्भ, लाभांश क्षमता, इपीएस, पीइ रेसियोका साथमा व्यवसाय विस्तारको सम्भावनातर्फ पनि विशेष ख्याल गर्नुपर्ने हुन्छ । यस दिन २२२ कम्पनीको ९२ लाख ३६ हजार भन्दा बढी कित्ता सेयर कारोबार भएको छ । १३ मध्ये ७ समूहको भाउ वृद्धि भएको छ ।

Leave a Reply

Your email address will not be published. Required fields are marked *