Get Our Android App

रजिष्ट्रार राजेश प्रसाईले आफ्नै श्रीमतीलाई कार्यालय सहायकका रुपमा नियुक्त गरे

मदन भण्डारी स्वास्थ्य विज्ञान प्रतिष्ठानका रजिष्ट्रार राजेश प्रसाईले आफ्नै श्रीमतीलाई प्रतिष्ठानको कार्यालय सहायक पदमा नियुक्त गरेका छन् । रजिष्ट्रार प्रसाईले बुधबार पत्नी कमला प्रसाई निरौलालाई कार्यालय सहायक पदमा नियुक्त गरेका हुन् ।

 

सो पदमा एक जना कर्मचारी माग भएकोमा रजिष्ट्रार प्रसाईंको श्रीमतीसहित अन्य पाँच जनाले आवेदन दिएका थिए । रजिष्ट्रार प्रसाई आफै उम्मेदवारहरूको परीक्षा र अन्तर्वार्तामा सहभागी भएका थिए । प्रसाईको संयोजकत्वमा रहेको पदपूर्ति समितिले कार्यालय सहायकसहित विभिन्न पदमा कर्मचारी नियुक्त गरेको छ ।

 

सो समितिको सदस्य सचिवमा प्रतिष्ठानका प्रशासकीय अधिकृत अमर अधिकारी, सदस्यमा प्रतिष्ठानका संयोजक चिरञ्जिवी चुडाल र अन्य विज्ञ रहेका छन् । प्रसाईले प्रदेशको लोकसेवा आयोगमार्फत कर्मचारी नियुक्ति गर्नुपर्ने प्रावधान विपरीत पदपूर्ति गरेका हुन् ।

 

लोक सेवा आयोगको प्रावधान मिचेर रजिष्ट्रार प्रसाईले कार्यविधि बनाएर प्रतिष्ठानका लागि विभिन्न १० पदमा विज्ञापन प्रकाशन गरेका थिए । प्रतिष्ठानले प्रकाशित विज्ञापनको असोज १२ र १३ गते क्रमशः लिखित र मौखिक परीक्षा संचालन गरेको थियो । उक्त परीक्षाको नतिजा बुधबार सार्वजनिक गरिएको थियो ।

Leave a Reply

Your email address will not be published. Required fields are marked *